Quanti mistera si fannu pi campari:
‘u falignami, ‘u muraturi, ‘u musicista,
‘u viddranu, ‘u maestru, ‘u giornalista.
E si sti travagli su’ fatti senza ngannu,
dunanu pani ma cu tant’affannu.
Pi li mbrugliuna, ca beni vonnu stari,
l’ arti giusta è sapiri chiacchiariari:
convegni, simposii, congressi e adunanze,
supra ‘u parcu a cumminciri la genti,
parlannu sempri pi nun diri nenti.
Cu lu microfunu, a li quattru venti,
di l’antri dicinu ca su’tutti fitenti,
ma “l’antri”… è iddru, ca pi lu putiri
si vinni ‘a matri, pi sulu quattru liri.
Darrè ‘u cudazzu comu cumpagnia,
davanti iddri, pi dari alligria,
fannu politica accussì perfetta
ca ti lassanu di stuccu e a vucc’aperta.
Carti ‘ne mani, prumissi e programmi,
pi tia si stoccanu puru li gammi
e, si ‘u latti d’aceddru ti po’ bisugnari,
allura ti dicinu ca sannu vulari.
Cu si trova nò bisognu permanenti,
cci duna forza e li vota ngenuamenti
perciò, s’acchiananu, fannu vucciria,
cumminti ca vinceru ‘a lotteria.
M’ arrivati ca sunnu a lu putiri,
pi la stanchezza di lu troppu diri,
anima e corpu si dunanu in famiglia
e si sistemanu ca è ‘na meraviglia.
Comu cunsigliu, si vulemu nsirtari,
pi Fonziu Purtusu ham’a ghjri a vutari.
Puru iddru sta sempri in prima fila
ma havi ‘u bonsenzu ca nun chiacchiaria
e, quannu grapi ‘a vucca, pari ca dici:
“Vutativilla ‘sta blibbaglia ngannatrici”!
Giuseppa Iacono Baldanza
