di Giuseppa Iacono Baldanza
Cinqu jorna di cori mi scialavu
ma lu sestu, beddra matri, accù pinsavu?
Mi niscì dè mani, tuttu cuntentu,
lu primu omu comu finimentu.
Pi fari beni e sempri n’pompa magna,
allatu ci misi ‘na cumpagna
cu ordini di godiri e di fari,
viviri, campari e scialacquari.
Nn’ abbunnanza, senza privazioni,
ci detti tuttu a una condizioni:
“Vostra è ogni cosa, pi l’eternità,
però stu pumu lassatimillu ccà”.
Qualumunnu l’avissi mai pinsatu!
Vutavu l’occhi e l’avianu strafucatu
e cummintu di purtalli a pintimentu
li privavu di ddru beddru gudimentu.
Cintinara di seculi passaru
ma chisti ‘a situazioni l’aggravaru:
liggi, derughi, emendamenti,
contru deci stitichi cumannamenti,
fatt’apposta picchì nnè tribunali
la giustizia pi tutti ‘un fussi uguali.
Mi scansavu di Sodoma e Gomorra
pi truvarimi mezzu sta zavorra
puttanera, mpami e curruttiva,
purtannu ‘n cunfusioni puru a mia,
qannu vju ca veni cunnannatu
‘u latru, cu ritu abbriviatu,
ca pi fami gaddrini v’arrubbari
e, prima di spinnalli, pò truvari
‘u judici già prontu a sintinziari
ca iddru ‘a libirtà sa pò scurdari.
Ma chiddru ca di cchiù mi fa ‘ncazzari
è ddru dittu ca sappiru ammmintari,
truvannusi d’accordu longhi e curti,
“Cu futti futti Diu pirduna a tutti”.
