Chi terra strana è la nostra!
Chjavuru di zagara e di rosi,
jardina d’aranci e di limuna
e ‘u rampicanti, dintra li grastuna,
cummoglia di virdi ‘i finistruna.
‘U celu è accussì azzurru
ca s’ammisca cu l’unna di lu mari
e li distisi di mennuli ‘nghiuri
parinu nivi di terra glaciali.
‘U furasteri ca ne nantri veni,
si dumanna e nun capisci beni
comu ‘ne sta terra di biddrizza
regna disordini, mafia e pigrizia!
Un mantu, ‘a sira, di stiddri e luna china
astuta ‘a menti e addruma ‘u cori,
ma pi li surci ca mezz’a strata stannu
diventa acqua pi lu scantu ‘u sangu.
Chi stravacanti armali sunnu chisti!
Stannu na fogna tutta la jurnata,
ma quann’u suli dò celu scumpari,
nescinu com’armata organizzata,
circannu na munnizza lu mangiari.
Criscinu grassi, firrigni e putenti,
ca di saluti n’hannu di jttari
e si ‘ncazzanu macari malamenti
si c’è sinturi di falli scuffari.
Iddri cumannanu, mangianu di tuttu
e stannu beni comu signoroni.
Vò vidiri ca st’armali maliditti
dunanu scola accù voli guvirnari?
Ma sunnu surci, chi ponnu ‘nsignari?
A essiri furbi, sapiri ‘mbrugliari,
campari nò fetu senza puzzari
o stari ‘nna mmerda senz’ affucari?
