QUALI ‘DE DU ‘U MEGLIU
A storia, ca vi staju pi cuntari,
unn’havi propriu nenti di speciali
picchì na vita pò sempri capitari
di truvarisi tra un lettu di spitali.
Si cci trasi e ‘un sì raccumanatu,
ti tocca un postu picchì sì furtunatu
e, ddra, trovi dicina di malati
ca com’attia sunnu dispirati.
Affuddrati comu sardi ‘ne stanzuna
ca t’arricordanu li vecchi casirmuna,
un trovi un dutturi mancu a pagari
e vidi ‘u mpirmeri si ha ‘u canocchiali.
T’ha fari largu a sati e spaddrati
pi scravaccari littina spunnati
e a tutti l’ura vid’ arrivari
amici e parenti cu lu mangiari.
Cu ‘a voli cotta, cu ‘a voli squadata,
cu si lamenta nmezz’a nuttata.
C’è cu pritenni ‘a radiu addrumata
o puru chiddru ca la vol’astutata.
Nni trovi unu ca voli parlari
da malatja pi megliu spiegari
ca lu so ficatu è malandatu
pi tutti ‘i colari ca s’ha pigliatu.
Si nsamà Diu quetu vò stari
l’antru, scantatu, ti po’ rrisbigliari
ca nun vidennu cchiù l’ucchiuzzu apertu,
abbanniannu, dici ca sì mortu.
Cu chist’armata ca si duna di fari,
a malatia ta fannu scurdari
e quannu nesci ‘un sà chi pinsari,
si era teatru o puru spitali.
Si putacasu sì raccumannatu
sì sempri malatu ma priviligiatu;
tutta la stanza ti ven’ affidata,
puru cu l’aria condizionata.
Ti voti e arrivoti cum’un dannatu
e vidi ‘a famiglia cu tempu cuntatu,
mentri ‘u mpirmeri , cu diligenza,
all’occorrenza serbi l’utenza.
Sì rivirutu, nun si pò nigari
si nun si bada a un particolari:
no cammaruni aviatu scialatu
ma na stanzetta paristi un cunnannatu.
Virità pi virità…
Si vulissi, oj comu oj, ricitari sti versi, i picciotti mi dicissiru: “Ma che esagerazione, queste cose accadevano nel secolo passato!”
Talia ccà, un c’havia pinsatu, ju parlu dò 1900, macari dò 1999 ma sempri seculu passatu è. Vò mettiri ‘u 2000? Sti cosi cchiù unn’esistinu. U’ spitali è novu, grande, corsii ca ti cci perdi a tal puntu ca, p’insirtari ‘u tò ripartu, ‘nna visitari minimu a mità e pi truvari a porta da stanza ca t’attocca, a grapiri, si ti và bona,trenta manigli.
I curritura ‘un sunnu cchiù affuddrati comu ‘na vota e pi vidiri n’arma viva macari pi dumannari “Pi cortesia, mi sapi diri… di luntanu vidi arricampari nantra pirsuna ca ti fa ‘a stessa dumanna e havi ‘u to stessu pinseri “Avissumu purtatu un segugiu!” Ma ‘i cani ‘o spitali ‘un ponnu trasiri.
Intendiamoci beni! Ju parlu dè reparti, no degli ambulatori. Ddra ti cci sciali!
Quannu trasi, li trovi accuss’affuddrati ca pensi d’assistiri a la prucissioni di la prima duminica di lugliu pi la festa di Sancalò. e mmeci do pani, ne mani ti trovi ‘u biglittinu cu numaru. Si ‘u numaru è vasciu ti pari di vinciri ‘a lotteria, ma s’è gavutu ti veni subitu nmenti ‘na bastemia, c’arriva puntuali di qualchidunu,scossu ne nerbi, doppu lunghe ore d’attesa e a l’addritta.Quannu a la fini arriva ‘u to turnu, mostri di cursa ‘u pizzinu, com’a diri “c’ha fici”.L’addettu talja e “Signor mio, ma nuddru cciù dissi ca ‘cca stu tipu d’analisi ‘un si fannu?Si rifacissi fari l’impegnativa e jissi o spitali vecchiu”. Già sì malatu, ma se subentra puru la depressioni, sei futtuto . A’stu puntu ottimisticamenti pensi “Vò vidiri ca chisti nun si fidanu da me malatia e misuranu la mia resistenza?” Ti cummeni rispirari pinzera di normalità, perciò ti fà ‘na sciddricata al Pronto soccorso, l’unicu repartu c’assimiglia a tutti i pronti soccorsi di‘stu munnu, ovverossia, chinu di genti ca si lamenta, ma sulu pi l’improvvisu malannu ca cci capità. Al tempo in cui l’idea fu pinsata,’un si sapiva ancora bene si fari carciri o spitali; accussi, pi ‘un ci esseri camurrii in avveniri, i finestri li ficiru beddri gavuti. Nel caso primo, a mettere na firrata un ci vuliva propriu nenti, nel caso secondo , pi grapili, qualchi seggia libira p’appiccicari s’avissi sempri truvatu.
E ‘u repartu d’ortopedia? Affidatu a la Divina Pruvvidenza.
Avia dittu ca ‘u spitali è novu! Ma ‘nzumma …novu. Novu pi modu di diri, picchì, virità pi virità, l’avianu costruitu nnò seculu passatu, aspittannu ca passassiru almenu trent’anni pi grapilu e festeggiare l’Anno Domini. ‘U 2000 cioè. E chistu nun fu un casu, ma un progettu. Di bottu la genti, abituata a ddru vecchiu tipu di struttura, dunni ‘i curniciuna, si si pigliavano di cuntintizza, qualchi cornu l’avissiru puru sirratu, e avvezza doppu tant’anni a quelle vecchie maniere che io descrivo, s’avissi sbilanciatu ‘u cervellu, cioè: strammava. Mmeci a picca a picca tuttu torna: ‘u cimentu “depotenziato,” pi fari càdiri ‘i pilastri tutta ‘na vota; i purtusa nnò pavimentu; i mura tra latte sporco e grigiu antracite; ‘u mangiari ne piatti bianchi di plastica c’appena li grapi ‘a faccia ti sbianchja comu ‘u piattu; l’ascensore ca certi voti acchiana e scinni e certi voti unnì voli sapiri; i pareti ca diventanu murales dunni ognunu cc’ esprime un desideriu; certi porti ca pi chjiurisi cc’ha dari un’ammuttuni ca spaddra e, nella recption, ca parin’abbergu, ha ringraziari a Diu se il personale ti stenni ‘u salutu. Prima ancora di dariti ‘u tempo di dimustrari ca li gammi l’ha stuccati o ca ti scanti d’aviri in corsu ‘ na peritonite, t’apostrofanu c’un perentoriu: “A rigetta dunn’è? Si ci l’havi ma dassi, si nun ci l’havi jissisi a fari subitu l’impegnativa”. Tu, timidamenti tra li dulura…”Ma ju”…, colto di sorpresa, cerchi di dari la risposta giusta, mentri l’antru, dopp’ un minutu, già spacinziatu e annirbatu: “Signor mio allistemuni e pochi chiacchiri. Ccà ‘un semu misi pi babbiari e mancu pi perderi tempu ammatula “. E in effetti nun babbianu picchì tuttu deve funzionare comu ‘u ralogiu da stazioni, accussì “come previsto dal protocollo”cioè l’orariu cuntatu pi ogni clienti, sostantivo positivo o postu di “malatu”. A meno che non fai parti da categoria ca pò diri: “Lei non sa chi sono io.” In tal caso, chissà da dove nesci fora chiddru ca ti canusci e diventi cosa sò. Ti stenni ‘u salutu e rispunni con solerzia “trasissi,trasissi”.
Mi astengo volutamente a parlari de duttura. Rispunnu comu chiddri populi sutta dittatura :” Unni putemu lamintari”. Capirete, ca me firma in calce, si cci trasu pi livarimi le “donzelle”, chisti i bisturi li usanu pi tagliarimi la lingua.
Giuseppa Iacono Baldanza
Giuseppa Iacono Baldanza è nata ad Agrigento. Scrittrice, poetessa, amante della cultura regionale, dei proverbi, dei motti, scrive in lingua siciliana.
(Immagine tratta da internet)
